ဒေါ်စုနဲ့ NLD ကျမ်းကျိန် လွှတ်တော်တက်ဖို့ဆုံးဖြတ်

တနင်္လာ, 30 ဧပြီ 2012

ကြားဖြတ်ရွေးကောက်ပွဲမှာ အနိုင်ရထားတဲ့ ဒေါ်အောင်ဆန်းစုကြည် အပါအ၀င် NLD ပါတီက ကိုယ်စားလှယ်တွေ ကျမ်းသစ္စာကျိန်ဆို ကြတော့မှာဖြစ်ပါတယ်။

ကြားဖြတ်ရွေးကောက်ပွဲမှာ ရွေးကောက်တင်မြှောက်ခံထားရတဲ့ ဒေါ်အောင်ဆန်းစုကြည်အပါအ၀င် အမျိုးသား ဒီမိုကရေစီအဖွဲ့ချုပ် NLD ပါတီကကိုယ်စားလှယ်တွေ မေလ ၂ ရက်နေ့မှာ လွှတ်တော်တွင်းသွားရောက်ပြီး ကျမ်းသစ္စာကျိန်ဆို ကြတော့မှာဖြစ်ပါတယ်။ ရက်အတော်ကြာ လိပ်ခဲတည်းလည်းဖြစ်နေခဲ့တဲ့ လွှတ်တော်မှာ ကျမ်းသစ္စာကျိန်ဆိုရေးကိစ္စကို NLD ဘက်က လိုက်လျောလိုက်တာပါ။

လွှတ်တော်တွင်းရောက်နေပြီးသား နိုင်ငံရေးပါတီတချို့က လွှတ်တော်ကိုယ်စားလှယ်တွေရဲ့ တိုက်တွန်းချက်ကို လေးစားတဲ့အနေနဲ့ရော မဲဆန္ဒရှင်ပြည်သူလူထုရဲ့ဆန္ဒကို လိုက်လျောသောအားဖြင့်ပါ အခုလို အလျှော့ပေး လိုက်တာဖြစ်တယ်လို့ ဒေါ်အောင်ဆန်းစုကြည်က ပြောပါတယ်။

လွှတ်တော်ကိုယ်စားလှယ်တွေ ကျမ်းသစ္စာကျိန်ဆိုတာမှာ ဖွဲ့စည်းပုံအခြေခံဥပဒေကို ကာကွယ်စောင့်ရှောက်ပါမည် ဆိုတဲ့ စကားရပ်အစား လေးစားလိုက်နာပါမည် ဆိုတဲ့စကားရပ်နဲ့ အစားထိုးပြင်ဆင်ပေးဖို့ ကြိုးစားနေခဲ့တဲ့ NLD ပါတီဘက်က အခုတော့ အလျှော့ပေး လိုက်လျောပြီး လက်ရှိစကားရပ်အတိုင်းပဲ ကျမ်းသစ္စာကျိန်ဆိုတော့မှာဖြစ်ပါတယ်။ ဒါကြောင့်လည်း မြန်မာ့နိုင်ငံ ရေးမှာ သီတင်းပတ်အတော်ကြာ ရှေ့မတိုးနောက်မဆုတ်ဖြစ်နေခဲ့တဲ့ ကိစ္စရပ်တခု ပြေလည်သွားပြီလို့ ဆိုရမှာပါ။
ဒီကနေ့မနက်ပိုင်း NLD ရုံးချုပ်မှာ ပါတီခေါင်းဆောင်တွေ အစည်းအဝေးထိုင်ပြီးတဲ့နောက်လုပ်တဲ့ သတင်းစာရှင်းလင်းပွဲအတွင်း ဒေါ်အောင်ဆန်းစုကြည်က ကြေညာလိုက်တာဖြစ်ပါတယ်။

လွှတ်တော်တွင်းရောက်နေပြီးသား တိုင်းရင်းသားစည်းလုံးညီညွတ်ရေးပါတီ၊ တိုင်းရင်းသားပါတီတွေ၊ တခြားပါတီတချို့နဲ့ တသီးပုဂ္ဂလ လွှတ်တော်ကိုယ်စားလှယ်တွေ စုပေါင်းပြီး လွှတ်တော်တက်ဖို့နဲ့ လွှတ်တော်တွင်းမှာ ပြောင်းလဲစေချင်ပါတယ်လို့ မေတ္တာရပ်ခံခဲ့ကြပြီးတဲ့နောက်ပိုင်း NLD ဘက်က အခုလို ဆုံးဖြတ်လိုက်တာလည်းဖြစ်ပါတယ်။ အဲဒီမေတ္တာရပ်ခံချက်ဟာ အင်မတန် မဟာမိတ်သဘောထားဆောင်ပြီး အားလုံးက ပူးပေါင်းဆောင်ရွက်ချင်တယ်ဆိုတာကို တင်ပြထားတာဖြစ်တယ်လို့ ဒေါ်အောင်ဆန်းစုကြည်က ပြောပါတယ်။ ဒါ့အပြင် ပြည်သူ့လွှတ်တော်ဥက္ကဋ္ဌ သူရဦးရွှေမန်းဆီ တင်ပြခဲ့တဲ့စာဟာလည်း ပူးပေါင်း ဆောင်ရွက်လိုတယ်ဆိုတာကို ပြနေတယ်လို့ ဆိုပါတယ်။

ကြားဖြတ်ရွေးကောက်ပွဲဝင်ဖို့ ဖြစ်စေခဲ့တဲ့ နိုင်ငံရေးပါတီများ မှတ်ပုံတင်ခြင်းဆိုင်ရာဥပဒေနဲ့ ရွေးကောက်ပွဲဆိုင်ရာဥပဒေတွေကို ပြင်ဆင်ဖို့ တင်ပြခဲ့တဲ့အချိန်တုန်းက ကျမ်းသစ္စာကျိန်ဆိုတဲ့စာသားကိစ္စကို တချိန်ထဲမှာကိုင်တွယ်ဖို့ သူ့အနေနဲ့ လစ်ဟင်းခဲ့ပါတယ် ဆိုပြီးတော့လည်း ဒေါ်အောင်ဆန်းစုကြည်က ၀န်ခံ ပြောဆိုခဲ့ပါတယ်။ အဲဒီအတွက်လည်း သူက တာဝန်ယူပါတယ်။

ဒါပေမဲ့လည်း ဖွဲ့စည်းပုံအခြေခံဥပဒေထဲမှာ တခုနဲ့တခု မဆီလျော်တဲ့စကားလုံးတွေ အများကြီးရှိနေတယ်ဆိုပြီး ဒေါ်အောင်ဆန်း စုကြည်က ထောက်ပြခဲ့ပါတယ်။ အခြေခံဥပဒေရဲ့ စာကိုယ်ထဲမှာသုံးထားတာတွေနဲ့ ဇယားထဲမှာ သုံးထားတာတွေ မတူတဲ့ အကြောင်း၊ လွှတ်တော်ကိုယ်စားလှယ်တွေ ကျမ်းကျိန်တဲ့စကားနဲ့ သမ္မတကျမ်းကျိန်တဲ့စကားတွေ မတူတဲ့အကြောင်း၊ အဲဒါ ကြောင့်လည်း ဥပဒေစိုးမိုးရေးသဘောတရားအရ၊ ဥပဒေရဲ့လုပ်ထုံးလုပ်နည်းအရ ပြင်ဆင်စရာတွေ အများကြီးရှိတယ်ဆိုတာကို တော့ ဥပဒေရှုထောင့်အရ အလေးအနက် ပြောသွားပါတယ်။ အရင်ဆွေးနွေးမှုတွေမှာ သမ္မတဦးသိန်းစိန်က လိုက်လျော လုပ်ဆောင်ပေးခဲ့တဲ့အပေါ်လည်း ကျေးဇူးတင်စကား ဆိုခဲ့ပါတယ်။(VOA)