သီဟသူရ ဦးတင်အောင်မြင့်ဦး နုတ်ထွက်ဟုဆို

တနင်္လာနေ့၊ မေလ ၀၇ ရက် ၂၀၁၂ ခုနှစ်

ကျန်းမာရေး အခြေအနေကြောင့် ဒုတိယသမ္မတ တဦးဖြစ်သည့် သီဟသူရ ဦးတင်အောင်မြင့်ဦးသည် လက်ရှိရာထူးမှ အနားယူရန် မေလ ၃ ရက်နေ့က နုတ်ထွက်စာ တင်ထားပြီး ဖြစ်သည်ဟု သတင်းများ ထွက်ပေါ်နေသည်။

လက်ရှိအစိုးရအဖွဲ့အတွင်း သဘောထား တင်းမာသူဟု ကျော်ကြားသည့် အသက် ၆၁ နှစ်အရွယ် အငြိမ်းစား ဗိုလ်ချုပ်ကြီး သီဟသူရ ဦးတင်အောင်မြင့်ဦးသည် အများပြည်သူ မြင်ကွင်းတွင် အတန်ကြာ ပျောက်ကွယ်နေပြီးနောက် ယခုကဲ့သို့ နုတ်ထွက်သည့်သတင်း ထွက်ပေါ်လာခဲ့ခြင်းလည်း ဖြစ်သည်။

ဦးတင်အောင်မြင့်ဦးသည် စင်္ကာပူမှ ဆေးဝါးကုသမှုခံယူ၍ ပြန်ရောက်လာပြီးနောက် ယခုကဲ့သို့ နုတ်ထွက်စာ တင်ခဲ့ခြင်းဖြစ်ကြောင်း VOA မြန်မာပိုင်း အစီအစဉ် အသံလွှင့်ချက်အား ကိုးကား၍ နိုင်ငံတကာ မီဒီယာများတွင် တနင်္ဂနွေနေ့ကတည်းက သတင်းများ ပြန့်နှံ့နေသော်လည်း နိုင်ငံတော် အစိုးရမှ တရားဝင် ထုတ်ပြန်ကြေညာခြင်း မရှိသေးပေ။

ကျန်းမာရေးကုသမှု ခံယူပြီးနောက် မြန်မာပြည်သို့ ပြန်ရောက်လာကာ ရဟန်းပြုဖို့ စီစဉ်နေသည်ဟုသိရပြီး သီဟသူရ ဦးတင်အောင်မြင့်ဦး အနေဖြင့် စိတ်ဖိစီးမှု ခံနေဖွယ်ရှိသည်ဟု နီးစပ်သည့် သတင်းရပ်ကွက်က ဆိုသည်။

တချိန်တည်းမှာပင် သမ္မတဦးသိန်းစိန်က ကက်ဘိနက်အဖွဲ့ကို ပြောင်းလဲဖွဲ့စည်းကာ ဝန်ကြီးဌာနအချို့ကို ပူးပေါင်းပြီး အရေအတွက် လျှော့ချလိမ့်မည်ဟု ထင်မြင်ကြေးပေးမှုများ နေပြည်တော်တွင် ဖြစ်ပေါ်လျက်ရှိသည်။

သီဟသူရ ဦးတင်အောင်မြင့်ဦးမှာ ၁၉၇၀ ခုနှစ် DSA ကျောင်းဆင်း ဖြစ်ပြီး ၁၉၉ဝ ခုနှစ်များအထိ အရှေ့မြောက်တိုင်း စစ်ဌာနချုပ် တိုင်းမှူးအဖြစ် တာဝန်ယူခဲ့သည်။ ၁၉၉၇ ခုနှစ်တွင် နအဖ စစ်ကောင်စီ၏ အတွင်းရေးမှူး(၁)အဖြစ် ခန့်အပ်ခြင်းခံရသည်။ ၂၀၀၉ ခုတွင် ဗိုလ်ချုပ်မှူးကြီးသန်းရွှေ၏ စစ်ရေးအကြံပေးအဖြစ် တာဝန်ယူခဲ့ရသည့် ဗိုလ်ချုပ်ကြီး သီဟသူရ တင်အောင်မြင့်ဦးမှာ ၂ဝ၁ဝ ရွေးကောက်ပွဲမတိုင်မီတွင် တပ်မတော်ရာထူးမှ နုတ်ထွက်ခဲ့သည်။

ထို့နောက် ရွေးကောက်ပွဲတွင် နေပြည်တော် ပုမ္ဗသီရိမြို့နယ် ပြည်သူ့လွှတ်တော်ကိုယ်စားလှယ်အဖြစ် ကြံ့ခိုင်ရေး ပါတီမှ ဝင်ရောက်ယှဉ်ပြိုင် အနိုင်ရရှိခဲ့ပြီး အခြေခံဥပဒေ ပုဒ်မ ၆ဝ(ခ)(၃)အရ တပ်မတော်သား ကိုယ်စားလှယ်များ အစုအဖွဲ့မှ ဒုတိယ သမ္မတအဖြစ် ရွေးချယ်တင်မြှောက်ထားခြင်း ခံရသူလည်း ဖြစ်သည်။

အကယ်၍ မေလ ၃ ရက်နေ့တွင် သီဟသူရ ဦးတင်အောင်မြင့်ဦး နုတ်ထွက်လွှာတင်ခဲ့ပါက အခြေခံဥပဒေ ပုဒ်မ ၇၃(ဆ)အရ ပြည်ထောင်စုလွှတ်တော် အစည်းအဝေးကို ၂၁ ရက်အတွင်း ခေါ်ယူ၍ သက်ဆိုင်ရာ တပ်မတော်သား ကိုယ်စားလှယ်များက ဒုတိယ သမ္မတ တဦးကို ထပ်မံ ရွေးချယ်တင်မြှောက်ပေးရမည် ဖြစ်သည်။(မဇ္ဈိမ)