စစ်အစိုးရ၏ လျှို့ဝှက်ဘဏ်စာရင်းကိစ္စကို ရေနံကုမ္ပဏီနှင့် ဘဏ်များငြင်းပယ်

Total Defends its Business in Burma

Friday, 11 September 2009 18:33 ဇာနည်ဝင်း

သဘာဝဓာတ်ငွေ့ ရောင်းရငွေများကို စစ်အစိုးရ၏ ပြည်ပ ဘဏ်စာရင်းအတွင်း သိမ်းထားသည် ဟူသော ERI ဟုခေါ်သည့် လူ့အခွင့်အရေးအဖွဲ့ တခု၏ ယမန်နေ့က အစီရင်ခံစာများတွင် စွပ်စွဲထားချက်ကို ဓာတ်ငွေ့ ကုမ္ပဏီကြီး တခု နှင့် စင်္ကာပူနိုင်ငံရှိ ဘဏ်များက ချက်ချင်း ပယ်ချလိုက်သည်။

စစ်အစိုးရက ၎င်းတို့၏ ဘဏ်များအတွင်း ဒေါ်လာ သန်း ၅၀၀၀ နီးပါး အပ်နှံထားသည်ဟူသော စွပ်စွဲချက်မှာ မဟုတ်မှန်ကြောင်း DBS Group Holdings နှင့် Oversea-Chinese Banking Corp (OCBC) ဘဏ် တို့က ယမန်နေ့ ညနေပိုင်းက ကြေညာချက်များ ထုတ်ပြန်ကြသည်ဟု သိရသည်။

“ERI ရဲ့ အစီရင်ခံစာက လုံးဝ မှားတယ်၊ အခြေအမြစ် မရှိဘူး”ဟု DBS ဘဏ် ပြောခွင့်ရ အရာရှိက ကြေညာချက်၌ ထည့်သွင်း ပြောကြားလိုက်ကြောင်း AFP သတင်းတပုဒ်တွင် ရေးထားသည်။ OCBC ဘဏ်မှ ပြောခွင့်ရပုဂ္ဂိုလ်ကလည်း အစီရင်ခံစာပါ ဖော်ပြချက်များကို လက်ခံနိုင်ခြင်းမရှိဟု ဆိုသည်။

ပြင်သစ်နိုင်ငံမှ ရေနံ နှင့် သဘာဝဓာတ်ငွေ့ ကုမ္ပဏီကြီးဖြစ်သည့် Total ၏ ဒုတိယ ဥက္ကဋ္ဌ Jean-Francois Lasalle ကလည်း အစီရင်ခံစာတွင် ဖော်ပြချက်များ မှားယွင်းနေသည်ဟု AFP သတင်းဌာနကို ပြောလိုက်သည်။

“မြန်မာပြည်မှာ ကျနော်တို့ ရှိနေတဲ့အတွက် အထူးသဖြင့် ပညာရေး၊ ကျန်းမာရေး နယ်ပယ်မှာ အကျိုး ဖြစ်ထွန်းမှုတွေ ဖြစ်ပေါ်လာတာကို အသိအမှတ်ပြုပြီး ထည့်မရေးထားဘူး” ဟု Total ဒုတိယ ဥက္ကဋ္ဌက ပြန်လည် တုံ့ပြန်လိုက်သည်ဟု သိရသည်။

ယမန်နေ့က ထုတ်ပြန်သည့် ERI ၏ အစီရင်ခံစာ ၂ စောင်တွင် တနင်္သာရီတိုင်း၊ ရတနာ သဘာဝ ဓာတ်ငွေ့ စီမံကိန်း ၀င်ငွေထဲမှ အနည်းဆုံး ဒေါ်လာ ၄.၈၀ ဘီလီယံကို စင်္ကာပူရှိ ဘဏ်များတွင် သိမ်းထားသည်ဟု ဖော်ပြထားသည်။

Total နှင့် Chevron ရေနံကုမ္ပဏီကြီးများက မြန်မာပြည်တွင် ရင်းနှီး မြှုပ်နှံသဖြင့် မြန်မာစစ်အစိုးရ ခေါင်းမာလာစေရေး အတွက် အကူအညီ ပေးရာရောက်ကြောင်း၊ သန်းပေါင်းများစွာသော ၀င်ငွေကြောင့် နိုင်ငံတကာ၏ စစ်အစိုးရအပေါ် ဖိအားများ ထိရောက်မှု လျော့နည်းခဲ့ရကြောင်း စသည်ဖြင့် ERI အဖွဲ့၏ အစီရင်ခံစာတွင် ဖော်ပြထားသည်။

ထို့အပြင် ၎င်းတို့၏ မြန်မာပြည်ရှိ သဘာဝဓာတ်ငွေ့ စီမံကိန်းနယ်မြေအတွင်း ဒေသခံများ လူ့အခွင့်အရေး ချိုးဖောက်ခံနေရသည်ဟု ERI က ရေနံကုမ္ပဏီကြီး ၂ ခုကို အပြစ်တင်ထားသည်။

ERI သည် အမေရိကန် ပြည်ထောင်စု အခြေစိုက် လူ့အခွင့်အရေးအဖွဲ့ တဖွဲ့ ဖြစ်သည်။ ERI၏ အစီရင်ခံစာ ၂စောင်နှင့် ပတ်သက်ပြီး မြန်မာစစ်အစိုးရက တစုံတရာ ထုတ်ဖော် ပြောကြားခြင်း မရှိသေးပေ။

မြန်မာပြည်တွင် အများအပြား ထွက်ရှိသော သဘာဝဓာတ်ငွေ့များကို အိမ်နီးချင်းနိုင်ငံများက ဝယ်ယူလျက်ရှိသည်။ ဓာတ်ငွေ့ ရောင်းရငွေ ဒေါ်လာ သန်းပေါင်းများစွာကို နိုင်ငံတော် ဘဏ္ဍာငွေတွင် ထည့်သွင်းထားခြင်း မရှိဘဲ စာရင်းပျောက်နေကြောင်း ERIက ထောက်ပြထားသည်။

နိုင်ငံက ဆင်းရဲနေပြီး၊ ပြည်သူများ စားဝတ်နေရေး ခက်ခဲနေချိန်၌ ဓာတ်ငွေ့ ရောင်းချရာမှ ရရှိသည့် ငွေအမြောက်အမြား မည်သည့်နေရာတွင် အသုံးပြုနေသနည်းဟုလည်း ပညာရှင်တချို့က မေးခွန်းထုတ်နေသည်။

“စစ်အစိုးရက လက်ရှိကာလမှာ လတိုင်း၊ လတိုင်း ဝင်ငွေ ဒေါ်လာ သန်းပေါင်း ရာနဲ့ချီပြီး ရှိတယ်။ ဒီငွေတွေ ဘယ်ရောက်သွားသလဲ ဆိုတာကတော့ စိတ်ဝင်စားစရာ ကောင်းတယ်” ဟု သြစတေးလျနိုင်ငံ၊ မက်ကွိုင်းယား တက္ကသိုလ်မှ ပါမောက္ခတဦးဖြစ်သူ မစ္စတာ ရှောင်တာနဲ (Sean Turnell) က ဧရာဝတီနှင့် တွေ့ဆုံရာတွင် မှတ်ချက် ပေးခဲ့ဖူးသည်။(ဧရာဝတီ)
---------------------------------------------------------------------------------
ဓာတ်ငွေ့ရောင်းရငွေများကို စစ်အစိုးရက စင်္ကာပူတွင် သိမ်းထားဟုဆို Thursday, 10 September 2009 17:24 သန်းထိုက်ဦး
မြန်မာစစ်အစိုးရက သဘာဝဓာတ်ငွေ့ ရောင်းချမှုမှ ရရှိသည့် ၀င်ငွေများကို စင်ကာပူနိုင်ငံရှိ ဘဏ်ကြီး နှစ်ခုတွင် လျှို့ဝှက် သိမ်းဆည်းထားသည်ဟု စုံစမ်းသိရှိရကြောင်း လူ့အခွင့်အရေးနှင့် သဘာဝ ပတ်ဝန်းကျင် ထိန်းသိမ်း ကာကွယ်ရေးအဖွဲ့ (ERI) က ယနေ့ ပြောဆိုလိုက်သည်။

ဒေါ်လာ ဘီလီယံ အများအပြားကို Overseas Chinese Banking Corporation (OCBC) နှင့် DBS group (DBS) ဘဏ် တို့တွင် သိမ်းဆည်းထားသည်ဟု ERI အဖွဲ့က ထုတ်ပြန်သည့် အစီရင်ခံစာ ၂ စောင်တွင် ဖော်ပြထားသည်။

“ကိုယ့်ပြည်သူလူထုရဲ့ လူမှုရေး အသုံးစရိတ် အာရှမှာ အနိမ့်ဆုံး၊ အဆင်းရဲဆုံး ဖြစ်နေချိန်မှာ ဗိုလ်ချုပ်ကြီးတွေကတော့ နိုင်ငံရဲ့ဝင်ငွေ ဒေါ်လာ ဘီလီယံပေါင်း များစွာကို စင်္ကာပူမှာ သွားပြီးတော့ လျှို့ဝှက် အပ်ထားတယ်” ဟု ERI မှ ပြောရေးဆိုခွင့်ရှိသူ Matthew Smith က ပြစ်တင် ဝေဖန်လိုက်သည်။

ကမ္ဘာ့ ငွေကြေးဈေးကွက်တွင် ထိုသို့ တရားမ၀င်သည့် ၀င်ငွေများအား တားဆီးရန်၊ စစ်အစိုးရနှင့် ပူးပေါင်း လုပ်ဆောင်သည့် အဖွဲ့အစည်း လုပ်ငန်းရှင်များအား ဖိအား ပေးရန်၊ စစ်အစိုးရ၏ ဘဏ် စာရင်းသို့ ငွေကြေး ၀င်ထွက်မှုများကို တင်းကျပ်ပေးရန် ERI အဖွဲ့က နိုင်ငံတကာသို့ တိုက်တွန်းလိုက်သည်။

မြန်မာပြည်တွင် ရင်းနှီး မြှုပ်နှံသည့် Total နှင့် Chevron ရေနံကုမ္ပဏီကြီးများက မြန်မာစစ်အစိုးရ ခေါင်းမာလာစေရေး အတွက် အကူအညီ ပေးနေကြောင်း၊ ထိုဝင်ငွေများကြောင့် စစ်အစိုးရအပေါ် ဖိအားပေးနေမှုများ ထိရောက်မှု လျော့နည်းခဲ့ရကြောင်း ERI အဖွဲ့၏ အစီရင်ခံစာက ဆိုသည်။

မြန်မာ စစ်အစိုးရသည် ထို ကုမ္ပဏီ ၂ခု၏ ရတနာ သဘာဝ ဓာတ်ငွေ့ စီမံကိန်းမှ ဒေါ်လာ ၄.၈၃ ဘီလီယံ ရခဲ့သည်ဟု ဆိုသည်။ ထိုအထဲမှ အနည်းဆုံး ၄.၈၀ ဘီလီယံကို နိုင်ငံတော် ဘဏ္ဍာငွေတွင် ထည့်သွင်းထားခြင်း မရှိဟု ဖော်ပြထားသည်။

အဆိုပါ စီမံကိန်း၏ တနင်္သာရီတိုင်း အတွင်း မိုင် ၂ဝဝ ကျော်ရှည်သည့် ဓာတ်ငွေ့ပိုက်လိုင်း ဖြတ်သွားရာ လမ်းတလျှောက်တွင် မွန်၊ ကရင် နှင့် ထားဝယ် ရွာသားများ လုပ်အားပေးရခြင်း၊ လယ်ယာ မြေ အသိမ်းခံရခြင်း၊ ရွာပြောင်းရွှေ့ရခြင်းများ ဖြစ်ပွားခဲ့သည်ဟု သိရသည်။ စီမံကိန်း လုံခြုံရေးကို တာဝန်ယူသည့် မြန်မာ့ တပ်မတော်က ထိုဒေသတွင် လူသတ်မှုများ၊ မုဒိမ်းမှုများ ကျူးလွန်သည်ဟုလည်း လူ့အခွင့်အရေး အဖွဲ့များက စွပ်စွဲထားသည်။

အမေရိကန် ပြည်ထောင်စု အခြေစိုက် ERI အဖွဲ့၏ အစီရင်ခံစာ ၂ ခုတွင်လည်း လူ့အခွင့်အရေး ချိုးဖောက်မှု၊ သဘာဝ ပတ်ဝန်းကျင် ပျက်စီးမှုများ အကြောင်းကို အဓိကထားပြီး ပြုစုထားသည်။(ဧရာဝတီ)
-------------------------------------------------------------------------