အထိန်းသိမ်းခံ လဲလှယ်ရေး ဆိုင်းငံ့ထားရန် အာဆီယံအမတ်များ တောင်းဆို

ကိုပေါက် | ကြာသပတေးနေ့၊ အောက်တိုဘာလ ၂၀ ရက် ၂၀၁၁ ခုနှစ် ၁၉ နာရီ ၄၃ မိနစ်
မလေးရှား-မြန်မာ နှစ်နိုင်ငံ အထိန်းသိမ်းခံများ လဲလှယ်ရေး အစီအစဉ်အား ရပ်ဆိုင်း ထားရန် မြန်မာနိုင်ငံဆိုင်ရာ အာဆီယံ လွှတ်တော် အမတ်များအဖွဲ့ AIPMC က ကြေညာချက် ထုတ်ပြန် တောင်းဆို လိုက်သည်။

ကြာသပတေးနေ့က ထုတ်ပြန်သည့် အဆိုပါ ကြေညာချက်တွင် မြန်မာပြည်သားများမှာ ၎င်းတို့ နိုင်ငံအတွင်း လူ့ အခွင့်အရေး ချိုးဖောက်မှုမျိုးစုံကြောင့် အိမ်နီးချင်း နိုင်ငံများသို့ ခိုလှုံရန် ရောက်ရှိလာကြခြင်း ဖြစ်၍ ယခု ပြန်ပို့မည့် အစီအစဉ်အား လွန်စွာစိုးရိမ်ကြောင်း ဦးစွာဖော်ပြထားသည်။

“ဒုက္ခသည်များနှင့် ခိုလှုံခွင့် တောင်းခံသူများအား မြန်မာပြည် ပြန်လျှင် နှိပ်စက် ညှဉ်းပမ်းမှုများမှ ကာကွယ်ထားရှိမှု
သေချာစေရန် ထိရောက်သည့် စနစ်တခု မရှိမချင်း လဲလှယ်ရေး အစီအစဉ်အား ဆိုင်းငံ့ထားရန် တောင်းဆိုလိုက် သည်” ဟု ကြေညာချက်တွင် ပါရှိသည်။

မလေးရှား ပြည်ထဲရေးဝန်ကြီး Datuk Seri Hishammuddin Hussein က ပြန်ပို့မည့် အထိန်းသိမ်းခံ တထောင်ထဲ တွင် ခိုလှုံခွင့်လျှောက် ထားသူများနှင့် ဒုက္ခသည်များ မပါဝင်ကြောင်း အင်္ဂါနေ့တွင် သတင်းထောက်များအား ပြော
ကြားထားသည်။

မလေးရှားနိုင်ငံရှိ ထိန်းသိမ်းရေးစခန်း ၁၃ ခုထဲတွင် မြန်မာနိုင်ငံသား သုံးထောင်ခန့် ရှိနိုင်ကြောင်း Burma Campaign – Malaysia က ခန့်မှန်းထားသည်။

ထိန်းသိမ်းရေးစခန်းများတွင် ချင်းလူမျိုး နှစ်ရာခန့်ရှိပြီး ပြန်ပို့မည့်အစီအစဉ်ထဲ မည်မျှပါဝင်မည်ကို မသိရှိနိုင်သေး
ကြောင်း ချင်းဒုက္ခသည်ကော်မတီ CRC မှ ဆက်သွယ်ညှိနှိုင်းရေးမှူး ကိုဟင်နရီက မဇ္ဈိမကို ပြောသည်။

“UNHCR card ကိုင်တဲ့သူတွေ၊ မကိုင်တဲ့သူတွေ၊ Passport သက်တမ်းကုန်သွားသူတွေ အကုန်ရှိတယ်။ တချို့တွေ က UNHCR card ကိုင်ထားတယ်။ ပြန်ပို့မယ့်အထဲ သူတို့ ပါမပါ ခွဲခြားမသိဘူးဖြစ်နေတယ်။ အကုန်ပို့မယ် ဆိုရင်
တော့ အဲဒီလူတွေပါ ပါသွားမှာပေါ့” ဟု သူကပြောသည်။

ထိန်းသိမ်းရေး စခန်းများသို့ သွားရောက် စုံစမ်းမေးမြန်းရန် မလွယ်ကူလှဘဲ အထိန်းသိမ်းခံများလည်း စခန်း အပြောင်းအလဲ မကြာခဏရှိတတ်ကြောင်း ကိုဟင်နရီက ဆိုသည်။

မလေးရှား NGO တခုဖြစ်သည့် Suaram အဖွဲ့ကလည်း ဤပြန်ပို့ရေးအစီအစဉ်မှာ မြန်မာပြည်သားအချို့အား “အသက် အန္တရာယ် ကျရောက်ဖွယ်ရှိသည့်” တိုင်းပြည် တပြည်သို့ တင်းအကြပ် ပြန်ပို့တဲ့သဘော ဖြစ်ကြောင်း
ဝေဖန်သည်။

ထို့ပြင် “မလေးရှားအစိုးရအနေဖြင့် ဒေသတွင်းရှိ ဒီမိုကရေစီမကျပြီး ရက်စက်ကြမ်းကြုတ်သည့် အစိုးရတရပ်အား အလွန်အကျွံအသိအမှတ်ပြုပေးနေခြင်း” ဟု Suaram ကြေညာချက်တွင် ပါရှိသည်။

ပြန်ပို့ရေးအစီအစဉ်တွင် ပါဝင်သူတို့၏ စရိတ်စကများအား မည်သူက တာဝန်ယူရမည်ကိုလည်း ရှင်းလင်းစွာ မသိရသေးသကဲ့သို့ လုံခြုံရေးအာမခံချက်လည်း မရှိသည့်အတွက် သဘောမတူနိုင်ကြောင်း ကိုဟင်နရီက “ဒီလူတွေကို ပြန်ပို့ရင်တော့ ဟိုမှာ ဒုက္ခကြုံရမှာ သေချာတယ်။ လက်ရှိအစိုးရရဲ့ လုံခြုံရေးကဏ္ဍကို မှန်းဆလို့ မရဘူး။ ဒီကိစ္စကို ကျနော်တို့ သိပ်သဘောမတူဘူး။ ဘာကြောင့်လဲဆိုတော့ ကျနော်တို့နိုင်ငံအစိုးရကို မယုံဘူး” ဟု ပြောသည်။

မလေးရှားနိုင်ငံတွင် ဒုတိယအများဆုံး နိုင်ငံခြားသားအဖြစ် မြန်မာနိုင်ငံသား ၅ သိန်းခန့် နေထိုင်ကြပြီး အများစုမှာ ချင်းနှင့် ကရင်လူမျိုးစုများ ဖြစ်ကြသည်။(မဇ္ဈိမ)